ជាម យៀប មន្រ្តីជាន់ខ្ពស់រដ្ឋសភាកម្ពុជាក្នុងពិធីខួបទី១៨ នៃការប្រកាសឲ្យប្រើរដ្ឋធម្មនុញ្ញនៅឯសណ្ឋាគារកាំបូឌីយ៉ាណា បានថ្លែងសារប្រាប់ទៅអ្នកតំណាងរាស្រ្ត ដែលហាក់ដូចជាសំដៅទៅលើតំណាងរាស្រ្តមកពីគណបក្សប្រឆាំងថា គួរពិនិត្យមើលច្បាប់រដ្ឋធម្មនុញ្ញរបស់កម្ពុជាសិន មុនពេលរត់ទៅពឹងពាក់បរទេស ពេលខ្លួនបាត់បង់អភ័យឯកសិទ្ធិ។លោក ជាម យៀប
លោក ជាម យៀប ដែលក៏ជាមន្រ្តីជាន់ខ្ពស់គណបក្សប្រជាជនកាន់អំណាចផងដែរបាននិយាយ ថា អ្នកតំណាងរាស្រ្តមានអភ័យឯកសិទ្ធិរបស់ខ្លួនគ្រប់គ្រាន់ក្នុងការ ធ្វើសកម្មភាពបំរើពលរដ្ឋក្នុងសង្គម។ ប៉ុន្តែបានបញ្ជាក់ថា ការរក្សាអភ័យឯកសិទ្ធិបាន លុះត្រាអ្នកតំណាងរាស្រ្តនោះ មើលច្បាប់ដែលមានចែងនៅក្នុងរដ្ឋធម្មនុញ្ញ ដើម្បីស្វែងយល់ពីតួនាទីរបស់ខ្លួន បើពុំដូច្នេះទេ អ្នកតំណាងរាស្រ្តនោះ នឹងប្រឈមផ្លូវច្បាប់ ហើយត្រូវបាត់បង់អភ័យឯកសិទ្ធិ។
ដោយលោក ជាម យៀប បានបន្តថា កន្លងមកបុគ្គលមួយចំនួន ដែលត្រូវបានដកអភ័យឯកសិទ្ធិ បានទៅប្តឹងសភា IPU, ទៅប្តឹងគ្រប់កន្លែង រហូតដល់អង្គការសហប្រជាជាតិ ស្តីពីអភ័យឯកសិទ្ធិ។
សូមរំលឹកថា តំណាងរាស្រ្តរបស់គណបក្សប្រឆាំងសមរង្ស៊ីចំនួន២រូប ត្រូវបានតុលាការស្នើទៅរដ្ឋសភាដកអភ័យឯកសិទ្ធិ ដែលក្នុងនោះមានលោក សម រង្ស៊ី ដែលត្រូវចោទប្រកាន់ពីការដកតម្រុយបង្គោលព្រំដែនកម្ពុជា យួន និងលោកស្រី មូរ សុខហួរ ក្នុងបណ្តឹងជាមួយនាយករដ្ឋមន្រ្តី ហ៊ុន សែន។
ទាក់ទិននឹងបញ្ហានេះ លោក យឹម សុវណ្ណ អ្នកនាំពាក្យគណបក្សសមរង្ស៊ីបាននិយាយថា ប្រទេសដែលគោរពច្បាប់ គេមិនដែលដកអភ័យឯកសិទ្ធិតំណាងរាស្រ្តណាដែលហ៊ានតវ៉ា ដើម្បីទាមទារផលប្រយោជន៍ស្របច្បាប់ជូនពលរដ្ឋ និងហ៊ានប្រឆាំងនឹងបរទេសដែលមានបំណងឈ្លានពានបូរណៈភាពទឹកដីខ្មែរ នោះទេ៕
0 comments:
Post a Comment