ករណីគ្រោះថ្នាក់ចរាចរណ៍ក្នុងអំឡុងពិធីបុណ្យភ្ជុំបិណ្ឌនៅឆ្នាំ ២០១១នេះ មានការថយចុះជាងឆ្នាំ២០១០ ប៉ុន្តែចំនួនអ្នកស្លាប់ដោយសារគ្រោះថ្នាក់ចរាចរណ៍មានការកើនឡើង ជាងឆ្នាំមុនៗ។១៧-មករា-២០១១៖ គ្រោះថ្នាក់ចរាចរណ៍នៅតាមដងផ្លូវមួយ ក្នុងរាជធានីភ្នំពេញ
នៅក្នុងឱកាសនៃពិធីបុណ្យភ្ជុំបិណ្ឌរយៈពេល ៣ថ្ងៃ នៅទូទាំងប្រទេសកម្ពុជា មានមនុស្សស្លាប់ដោយគ្រោះថ្នាក់ចរាចរណ៍ចំនួន ២៥នាក់ របួសធ្ងន់ ៩៨នាក់ និងរបួសស្រាល ៦៨នាក់។
មន្ត្រីប៉ូលិសមានមោទនភាពថា ចំនួននេះបានបញ្ជាក់ពីអ្នកបើកបរចេះគោរពច្បាប់ និងយល់ដឹងពីច្បាប់ចរាចរណ៍កាន់តែច្រើនឡើង។លោក ហ៊ឹម យ៉ាន ប្រធាននាយកដ្ឋានសណ្ដាប់ធ្នាប់សាធារណៈនៃក្រសួងមហាផ្ទៃ ឲ្យដឹងនៅថ្ងៃទី ២៩ កញ្ញា ថា គិតពីថ្ងៃទី២៦ ដល់ថ្ងៃទី២៨ កញ្ញា ឆ្នាំ២០១១ អ្នកគ្រោះថ្នាក់ចរាចរណ៍មានចំនួន ៧៥ករណី ថយចុះចំនួន ២៤ករណី បើធៀបរយៈពេលដូចគ្នាក្នុងរដូវភ្ជុំឆ្នាំ២០១០ ប៉ុន្តែអ្នកស្លាប់មានចំនួន២៥នាក់។ លោកបន្តថា ខេត្តដែលមានគ្រោះថ្នាក់ច្រើនជាងគេនោះ គឺខេត្តកំពង់ចាម ខេត្តបាត់ដំបង និងខេត្តកណ្ដាល។
លោកបន្តថា ៖ «កន្លែងហ្នឹងគឺមានប្រជាជនច្រើន ខេត្តធំៗទាំង៣ហ្នឹង។ ប្រជាជនសុទ្ធតែ ១លានជាង ហើយបាត់ដំបង ក៏ក្បែរលានដែរ កណ្ដាលអី ទី១។ ទី២ មមាញឹកក្នុងការធ្វើចរាចរណ៍ អ្នកទៅលេងស្រុកលេងអីច្រើន។ គិតថា យើងមានភាពល្អប្រសើរជាងមុន អាស្រ័យដោយចំនួនគ្រោះថ្នាក់ ក៏ដូចជាអត្រារងរបួសអីហ្នឹងថយ»។
ចំណែកនាយរងការិយាល័យចរាចរណ៍ផ្លូវគោក លោក ប៊ែន ឃុន បានបញ្ជាក់ប្រាប់ពីបញ្ហាគ្រោះថ្នាក់ចរាចរណ៍នៅរាជធានីភ្នំពេញថា គិតចាប់ពីថ្ងៃបិណ្ឌមួយ គឺថ្ងៃទី១៣ កញ្ញា ដល់បិណ្ឌទី១៥ ថ្ងៃទី២៧ កញ្ញា មានគ្រោះថ្នាក់ចំនួន ១៦ករណី បង្កឲ្យស្លាប់មនុស្សចំនួន ៩នាក់ របួសធ្ងន់ ១៦នាក់ និងរបួសស្រាល ៨នាក់។ ដោយឡែកគិតរយៈពេល ៣ថ្ងៃ គឺថ្ងៃភ្ជុំធំទី២៦ ដល់ទី២៨ នៅរាជធានីភ្នំពេញ មាន ៣ករណី បណ្ដាលឲ្យស្លាប់ ២នាក់ របួសធ្ងន់ ២នាក់ និងរបួសស្រាលម្នាក់ ប៉ុន្តែឆ្នាំ២០១០ ពុំមានអ្នកស្លាប់នោះទេ។
លោក ប៊ែន ឃុន មានប្រសាសន៍បន្ថែម ៖ «ខ្ញុំគិតថា វាជាប្រការល្អដែរនៅបុណ្យភ្ជុំបិណ្ឌនេះ ដោយគ្រោះថ្នាក់ចរាចរណ៍វាអត់មានច្រើន។ បើខុសពីថ្ងៃភ្ជុំបិណ្ឌ មានឱកាសនៃគ្រោះថ្នាក់ច្រើនជាង។ ឧទាហរណ៍កាលពីខែមុនអ៊ីចឹង មានគ្រោះថ្នាក់ស្លាប់ដល់ទៅ ៣២នាក់ឯណោះ»។
លោក សែម បញ្ញាវុឌ្ឍ ជាអ្នកគ្រប់គ្រងប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍នៃអង្គការហិនឌីខែប អ៊ិនធើណាស៊ិនណល (Handicap International)។ លោកបានកត់សម្គាល់ថា មូលហេតុដែលបណ្ដាលឲ្យមានអ្នកស្លាប់ដោយសារគ្រោះថ្នាក់ច្រើនជាង ឆ្នាំមុនៗនោះ គឺមកពីការបើកបរលើសល្បឿនកំណត់ បើកបរក្នុងស្ថានភាពស្រវឹង និងការវ៉ាជែងក្នុងស្ថានភាពគ្រោះថ្នាក់។
លោកបញ្ជាក់បន្ថែម ៖ «មួយទៀតគឺថា រចនាសម្ព័ន្ធផ្លូវថ្នល់។ យើងសង្កេតឃើញថា មានការធ្វើឲ្យប្រសើរឡើងច្រើននៅតាមផ្លូវជាតិសំខាន់ៗ ដូច្នេះហើយខ្ញុំគិតថា នៅពេលដែលផ្លូវកាន់តែល្អ ការបើកបររបស់ប្រជាពលរដ្ឋយើងគាត់មិនបានយកចិត្តទុកដាក់ គាត់បើកបរក្នុងល្បឿនលឿន វាជាកត្តាចម្បងដែលបង្កឲ្យមានគ្រោះថ្នាក់។ បើសិនជាមានការធ្វេសប្រហែស បើសិនពលរដ្ឋអត់មានការគោរពច្បាប់ទេ បញ្ហាស្លាប់នៅតែមានការកើនឡើង»។
មន្ត្រីអង្គការ ហិនឌីខែប អ៊ិនធើណាស៊ិនណល ដដែល បានផ្ដល់អនុសាសន៍ថា ដើម្បីទប់ស្កាត់បញ្ហានេះ គួរផ្សព្វផ្សាយដល់ប្រជាពលរដ្ឋបន្ថែមទៀតពីកត្តាហានិភ័យដែលបង្កហួស ល្បឿនកំណត់ បើកបរពេលស្រវឹង និងលើកកម្ពស់ការពាក់មួកសុវត្ថិភាព ដោយសារអ្នកស្លាប់បានប៉ះទង្គិចក្បាលមានរហូតដល់ ៧៣% នៅពេលមានគ្រោះថ្នាក់ និងរឹតបន្តឹងចំពោះការអនុវត្តច្បាប់៕
0 comments:
Post a Comment