ក្រុមអ្នកឃ្លាំមើលសាលាក្ដីខ្មែរក្រហមបានលើកឡើងថា ទោះបីជាអង្គការសហប្រជាជាតិនឹងតែងតាំងសហចៅក្រមស៊ើបអង្កេតថ្មី មកជំនួសអតីតសហចៅក្រមស៊ើបអង្កេតអន្តរជាតិដែលទើបតែលាលែងពីតួនាទី របស់ខ្លួន លោក ស៊ីកហ្រ្វីដ ប្លាំង (Siegfried blunk) ក្ដី ក៏វានៅតែមិនធ្វើឲ្យតុលាការនេះឯករាជ្យនោះដែរ។អតីតសហចៅក្រមស៊ើបអង្កេតអន្តរជាតិនៃ សាលាក្ដីខ្មែរក្រហម លោក ស៊ីកហ្វ្រីដ ប្លាំង (Siegfried blunk) [ជួរមុខ ឆ្វេង] នៅថ្ងៃចាប់ផ្ដើមបំពេញការងារកាលពីថ្ងៃទី១ ខែធ្នូ ឆ្នាំ២០១០។
ក្រុមអ្នកឃ្លាំមើលសាលាក្ដីខ្មែរក្រហមបានជំរុញឲ្យអង្គការ សហប្រជាជាតិ បើកកិច្ចពិភាក្សាជាមួយនឹងរដ្ឋាភិបាលកម្ពុជា ឲ្យបានច្បាស់លាស់ កុំឲ្យរដ្ឋាភិបាលលូកដៃទៅក្នុងដំណើរការរបស់សាលាក្ដីខ្មែរក្រហម ដើម្បីឲ្យតុលាការនេះមានភាពឯករាជ និងជាក្ដីសង្ឃឹមរបស់ជនរងគ្រោះទាំងឡាយ។
ការលើកឡើងនេះ នៅបន្ទាប់ពីសហចៅក្រមស៊ើបអង្កេតអន្តរជាតិ លោក ស៊ីកហ្រ្វីដ ប្លាំង បានលាលែងពីតួនាទីរបស់លោក កាលពីថ្ងៃទី១០ ខែតុលា ដោយសារតែហេតុផលមានសម្ពាធនយោបាយពីរដ្ឋាភិបាលលើសំណុំរឿងលេខ ០០៣ និង ០០៤។
លោក អ៊ូ វីរៈ ជាប្រធានមជ្ឈមណ្ឌលសិទ្ធិមនុស្សកម្ពុជា។ លោកមានប្រសាសន៍នៅថ្ងៃទី១១ តុលា ថា ការលាលែងពីមុខងាររបស់សហចៅក្រមអន្តរជាតិរូបនេះ វាកាន់តែឆ្លុះបញ្ចាំងឲ្យឃើញកាន់តែច្បាស់ថែមទៀតថា តុលាការនេះស្ថិតនៅក្រោមសម្ពាធនយោបាយរបស់រដ្ឋាភិបាលកម្ពុជា ដោយសារតែរដ្ឋាភិបាលមិនអនុញ្ញាតឲ្យមានការស៊ើបអង្កេតសំណុំរឿង ០០៣ និង ០០៤ ដែលជាជំហានមួយ និងមិនចង់មានករណី ០០៥ បន្តទៀត ពីព្រោះខ្លាចវាពាក់ព័ន្ធនឹងមន្ត្រីរដ្ឋាភិបាលបច្ចុប្បន្ន ជាមួយតួនាទីអតីតកាលនៅក្នុងរបបខ្មែរក្រហម។
សេចក្ដីប្រកាសព័ត៌មានរបស់លោក ស៊ីកហ្រ្វីដ ប្លាំង កាលពីថ្ងៃទី១០ តុលា បានចោទប្រកាន់មន្ត្រីជាន់ខ្ពស់រដ្ឋាភិបាល និងលោកនាយករដ្ឋមន្ត្រីថា បានលូកដៃក្នុងកិច្ចការរបស់តុលាការ ដោយសារលោក ហ៊ុន សែន បានជម្រាបលោកអគ្គលេខាធិការអង្គការសហប្រជាជាតិ បាន គីមូន (Ban Ki-moon) ថា មិនអនុញ្ញាតឲ្យមានសំណុំរឿង ០០៣ និង ០០៤ ខណៈលោក បាន គីមូន មកបំពេញទស្សនកិច្ចនៅកម្ពុជា កាលពីឆ្នាំ២០១០។
លោក ប្លាំង បានបញ្ជាក់នៅក្នុងសេចក្ដីថ្លែងការណ៍នោះថា បើទោះបីជាគាត់មិនដាក់ខ្លួនគាត់ឲ្យស្ថិតនៅក្រោមឥទ្ធិពលនៃការ លើកឡើងរបស់រដ្ឋាភិបាលបែបនេះក៏ដោយ ក៏នៅតែមានភាពមន្ទិលសង្ស័យទៅលើលទ្ធភាពរបស់លោក ក្នុងការទ្រាំទ្រនឹងសម្ពាធពីរដ្ឋាភិបាល និងលទ្ធភាពក្នុងការបំពេញការងាររបស់លោកដោយឯករាជ្យ ហើយក៏បង្កឲ្យមានមន្ទិលសង្ស័យចំពោះសុចរិតភាពនៃដំណើរការរបស់ តុលាការក្នុងសំណុំរឿង ០០៣ និង ០០៤។
ទោះបីជាយ៉ាងណាក៏ដោយ ការលាលែងរបស់លោក ប្លាំង ពីតួនាទីនេះ ក្រោយពីអង្គការឃ្លាំមើលសិទ្ធិមនុស្ស Human Rights Watch បានស្នើឲ្យសហចៅក្រមស៊ើបអង្កេតជាតិ លោក យូ ប៊ុនឡេង និងសហចៅក្រមស៊ើបអង្កេតអន្តរជាតិ ជនជាតិអាល្លឺម៉ង់ លោក ស៊ីកហ្រ្វីដ ប្លាំង លាលែងចេញពីតំណែង។
កញ្ញា សេង ធារី ជាប្រធានសមាគមជនរងគ្រោះក្នុងរបបខ្មែរក្រហមនៅកម្ពុជា។ កញ្ញាបានលើកហេតុផលថា សហចៅក្រមស៊ើបអង្កេតជាតិ លោក យូ ប៊ុនឡេង គួរលាឈប់ពីការងារដែរ ដើម្បីបញ្ជាក់ពីភាពស្អាតស្អំរបស់លោកដល់ជនរងគ្រោះក្នុងរបបខ្មែរ ក្រហម ដោយហេតុថា បើលោកនៅតែបន្តការងារស្ថិតនៅក្រោមសម្ពាធរបស់រដ្ឋាភិបាលបែបនេះ លោកនឹងទទួលខុសត្រូវនូវទង្វើរបស់លោកនៅពេលអនាគត។
មន្ត្រីនាំពាក្យនៃសាលាក្ដីខ្មែរក្រហម លោក នេត្រ ភក្ត្រា បានអះអាងថា ការអំពាវនាវឲ្យមន្ត្រីតុលាការលាលែងពីតំណែងនេះ មិនមែនជាលើកទី១ទេ។ ប៉ុន្តែលោកបានបំភ្លឺថា ការអនុវត្តការងាររបស់តុលាការ គឺឯករាជ្យ មិនពាក់ព័ន្ធទៅនឹងរឿងនយោបាយអ្វីទេ។
លោក ប៊្រែត អាដាម (Brad Adams) ជាប្រធានអង្គការឃ្លាំមើលសិទ្ធិមនុស្ស Human Rights Watch។ លោកបានសម្ដែងសុទិដ្ឋិនិយមចំពោះការលាលែងពីតួនាទីរបស់លោក ប្លាំង ពីព្រោះថា លោក ប្លាំង មិនបានបំពេញការងាររបស់ខ្លួនប្រកបដោយវិជ្ជាជីវៈនោះទេ ៖ "មាន មនុស្សច្រើនណាស់ដែលធ្វើការនៅក្នុងសាលាក្ដីខ្មែរក្រហមបានប្រាប់ យើង ដោយសុំឲ្យលាក់អត្តសញ្ញាណ។ ពួកគេបានប្រាប់យើងថា រដ្ឋាភិបាលបានចេញសេចក្ដីណែនាំមកលើពួកគេ។ បុគ្គលិកខ្មែរទាំងនោះបានប្រាប់រឿងនេះទៅបុគ្គលិកបរទេស"។
ទាក់ទងនឹងការចោទប្រកាន់ថា រដ្ឋាភិបាលកម្ពុជា មានសម្ពាធលើកិច្ចការរបស់តុលាការនេះ លោក ហោ ណាំហុង ជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស បានលើកឡើងនៅក្នុងសន្និសីទសារព័ត៌មាននៅថ្ងៃទី១១ តុលា ដោយបន្ទោសសាលាក្ដីខ្មែរក្រហមថា បានដំណើរការងាររបស់ខ្លួនយឺត ចំណាយថវិកាអស់ជាច្រើនរយលានដុល្លារហើយទើបកាត់ទោសបានតែ ឌុច ម្នាក់។
លោក ហោ ណាំហុង បានបញ្ជាក់ថា ការស៊ើបលើសំណុំរឿង ០០៣ និង ០០៤ នោះ ជាសិទ្ធិរបស់តុលាការ រដ្ឋាភិបាលមិនលូកដៃក្នុងរឿងនោះទេ។
មន្ត្រីនាំពាក្យអង្គការសហប្រជាជាតិ លោក អេឌូអាដូ ដែលបឺយ (Eduardo del Buey) ថ្លែងថា លោកអគ្គលេខាធិការអង្គការសហប្រជាជាតិ បានថ្លែងអំណរគុណដល់ចៅក្រម ប្លាំង ចំពោះការបំពេញការងារ និងហេតុផលបញ្ជាក់ពីការលាលែងរបស់លោក។ លោក ដែលបឺយ ប្រាប់អ្នកសារព័ត៌មានថា "អង្គការសហប្រជាជាតិតែងបញ្ជាក់ជានិច្ចថា អ.វ.ត.ក ត្រូវតែអនុញ្ញាតឱ្យដំណើរការទៅដោយគ្មានជ្រៀតជ្រែកពីខាងក្រៅណា មួយឡើយ រាប់ទាំងពីរដ្ឋាភិបាលកម្ពុជា ម្ចាស់ជំនួយ ឬសង្គមស៊ីវិលនោះឡើយ"។
លោកបន្ថែមថា "អង្គការសហប្រជាជាតិកំពុងធ្វើការជាបន្ទាន់ ដើម្បីធានាថា សហចៅក្រមស៊ើបអង្កេតបម្រុង គឺលោក ឡូរ៉ង់ កាស៉្បៀ អានសេម៉េ (Laurant Kasper Ansermet) នឹងត្រូវដាក់ជំនួសចៅក្រម ប្លាំង ឱ្យបានឆាប់បំផុត ដើម្បីកុំឱ្យការងារ អ.វ.ត.ក ត្រូវរាំងស្ទះ"។
លោក ឆាំង យុ ជាប្រធានមជ្ឈមណ្ឌលឯកសារកម្ពុជា។ លោកបានពន្យល់ថា ការលាឈប់ពីតួនាទីរបស់លោក ប្លាំង នេះ មិនទាន់គ្រប់គ្រាន់ទេ។ អង្គការសហប្រជាជាតិត្រូវតែធ្វើការស៊ើបអង្កេតការិយាល័យស៊ើបអង្កេត សហចៅក្រមនេះឲ្យបានច្បាស់លាស់ អំពីមូលហេតុដែលលោក ប្លាំង បានលាងពីតួនាទីនោះ។
មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានហៅការលាលែងរបស់សហចៅក្រមស៊ើបអង្កេតអន្តរជាតិ លោក ស៊ីកហ្រ្វីដ ប្លាំង នោះ គឺជាការបរាជ័យរបស់លោកនៅក្នុងការបំពេញការងាររបស់លោកទៅវិញទេ។
ទោះជាយ៉ាងនេះក្ដី ក្រុមអ្នកឃ្លាំមើលដំណើរការតុលាការខ្មែរក្រហម បានអះអាងថា តុលាការនេះស្ថិតនៅក្រោមសម្ពាធអំណាចរបស់រដ្ឋាភិបាល ពីព្រោះថា តុលាការនេះមិនអាចកោះហៅសាក្សីដែលជាមន្ត្រីជាន់ខ្ពស់រដ្ឋាភិបាល មកសាកសួរបាននោះឡើយនាពេលកន្លងមក។
នៅក្នុងសេចក្ដីប្រកាសព័ត៌មានរបស់អ្នកនាំពាក្យអគ្គលេខាធិការ អង្គការសហប្រជាជាតិ បានបញ្ជាក់ជាថ្មីថា នៅក្រោមកិច្ចព្រមព្រៀងរវាងអង្គការសហប្រជាជាតិ និងរដ្ឋាភិបាលកម្ពុជា អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ត្រូវបានបង្កើតឡើងជាតុលាការឯករាជ្យ ដោយប្រើប្រាស់បុគ្គលិក និងចៅក្រមចម្រុះកម្ពុជា និងអន្តរជាតិ។ តុលាការនេះកំណត់កាត់ក្ដីជនទាំងឡាយណា ដែលទទួលខុសត្រូវខ្ពស់បំផុតចំពោះការសម្លាប់រង្គាល និងឧក្រិដ្ឋកម្មដទៃទៀត ដែលប្រព្រឹត្តឡើងខ្មែរក្រហមកាលពី ៣ទសវត្សកន្លងទៅ។
បន្ថែមពីលើនេះ ក្រុមអ្នកឃ្លាំមើលដំណើរការរបស់សាលាក្ដី បានជំរុញឲ្យអង្គការសហប្រជាជាតិធ្វើការស៊ើបអង្កេតលើករណី ០០៣ និង ០០៤ ជាដាច់ខាត ដើម្បីឲ្យតុលាការនេះមានតម្លាភាព និងឯករាជ្យ។
អង្គការសហប្រជាជាតិត្រូវឆ្លើយតបជាចំហទៅចំពោះរដ្ឋាភិបាលកម្ពុជា ថា បើសិនជារដ្ឋាភិបាលនៅតែបន្តជ្រៀតជ្រែកកិច្ចការផ្ទៃក្នុងរបស់ តុលាការទៀត អង្គការសហប្រជាជាតិនឹងត្រូវដកខ្លួនចេញពីតុលាការកូនកាត់មួយនេះ៕
0 comments:
Post a Comment